佛羅倫斯5大必遊景點

趁住今年農曆新年, 出走意大利佛羅倫斯, 目的就係為左呢5大必遊景點

第一位︰聖母百花聖殿　(Basilica di Santa Maria del Fiore)

就算你常年出入歐洲，睇教堂睇到悶，有審美疲勞，但呢個真係唔可以錯過﹗入場費 10歐羅已經包括登上聖母百花大教堂、同側邊個喬托鐘樓，欣賞360度無遮無擋佛羅倫斯靚絶屋頂景。不過，登頂前要行幾百級樓梯，平時行開山都行到喘晒氣。想二擇其一的話，一定揀上聖母百花大教堂，因為上到最頂無鐵絲網圍住，撞啱時間，攬住你個BB豬一齊睇日落真係好浪漫架﹗不過我個人認為最抵睇既係能夠近距離睇到DUOMO頂部「最後審判」幅畫。教堂成十幾廿層樓高，唔上去都唔知原來幅畫係咁架﹗近距離睇真係好震撼﹗最底層既地獄世界，啲鬼樣全部勁猙獰，同香港個虎豹別墅有得揮，同樣都係用黎嚇細路用既。

第二位︰米高安哲羅　(The Piazzale Michelangelo)

佛羅倫斯美景如畫，但係究竟係邊度睇先至最吸引，我覺得係呢度 – 米高安哲羅廣場(The Piazzale Michelangelo)。呢個又係要行樓梯既，如果想舒服啲，搭12或13號巴士都得。(BTW, 係意大利千祈唔好上咗巴士先買飛，因為無論長程短程一律2歐羅，仲要不設找續，記住事先係報紙檔或煙仔檔買定90分鐘任搭飛都係1.2歐羅，其實無論邊種飛都好貴，我都建議大家用腳行，仲會有好多意外發現添)

第三位︰全家總動員 Restorante Cafaggi

呢間家庭式意大利餐廳冇裝修、冇環境、甚至可以講係冇service，但係食完一餐後，我希望可以日日黎食﹗一步入餐廳，已經聞到陣親切既味道，舊式木傢俱，簡簡單單乾乾淨淨，首先出場既係負責落單同上菜既「爸爸」，話明家庭式餐廳所以碟頭都跟返傳統意大利餐廳一樣偏大，胃口不太大的話，每人一個主菜，再share配菜吃已經非常足夠(因為個配菜同主菜基本上係一樣大碟既)。呢度既菜式實而不華，全部以家庭菜為主，好似炆牛肉、茄汁煮牛肚咁，每一道菜都做得恰到好處。最大驚喜反而是甜品，加咗幾十度烈酒既雪葩，食落一下甜一下辣，食得好鬼刺激。臨走時見到嫲嫲出現，仲有負責收銀既爺爺，阿爺爺年紀老邁，全程超慢動作數~~~錢~~~找~~~錢~~~﹗望住阿爺爺有點勉強既動作，不禁有點熱淚盈眶，想起香港既家庭小店買少見少，每次幫趁呢啲鋪頭都會特別珍惜，出門口後即刻嗱嗱聲上Google Review同Tripadvisor寫個好評，希望能夠盡點綿力，幫幫手吸引更多客戶幫襯。

地址︰Via Guelfa | 35 Rosso, 50129 Florence, Italy
開業時間︰ 12:30–15:00, 19:00–22:00

第四位︰烏菲茲美術館(Uffizi Museum)

佛羅倫斯作為美藝復興既發源地，收藏了極多包括達文西、拉菲爾、波提切利等名師既作品。長期名列本人最愛美術館榜首位置﹗(又Btw 去前最好先網上訂票，因為都多人排隊，尤其係假期，意大利效率又高呢)

第五位︰亂行

你一定以為我寫到尾，開始hea寫，其實係真心推介大家試下漫無目的係佛羅倫斯亂~咁~行~，包你必定有意外發現。如果你喜歡購物，你會發現很多優質的專賣店，像手造的意大利皮鞋店、真皮手套店、古董二手衣飾店、手作飾品店等等，真的是每一條街都有驚喜，不過亂行都唔係無秘訣既，總之就係要避開最主要的街道走，因為主要街道上只有大型連鎖店，而且遊客也多，嘈嘈吵吵的跟走在尖吵咀廣東道沒有大分別。